تعلم القرآن الكريم وتدبر معانيه عبادة من أعظم العبادات. بس ممكن نكون بنقرأ آية ومفسرين كلمة فيها بغير المعنى الحقيقي ليها. وفي الفيديو ده هنتعرف على معاني 10 كلمات في القرآن الكريم ممكن نكون فاهمينها غلط زي كلمة «العفو» في قول الله سبحانه وتعالى: {وَيَسْأَلُونَكَ مَاذَا يُنْفِقُونَ قُلِ الْعَفْوَ} واللي ممكن نكون فاهمينها بمعنى المغفرة، في حين إن معناها الزيادة اللي بتفيض عن حاجتك ومعاشك، واللي التصدق بها بيكون قربة لله سبحانه وتعالى. كمان كلمة «يشري» في قول الله سبحانه وتعالى: {وَمِنَ النَّاسِ مَنْ يَشْرِي نَفْسَهُ ابْتِغَاءَ مَرْضَاتِ اللَّهِ} اللي مش معناها يشتري، وإنما معناها يبيع نفسه ويبذلها في سبيل رضا ربنا سبحانه وتعالى. وفي الآية الشريفة اللي ربنا ضرب فيها المثل للمنافقين إنهم زي ناس كانوا ماشيين في ضوء البرق وقال: {يَكَادُ الْبَرْقُ يَخْطَفُ أَبْصَارَهُمْ كُلَّمَا أَضَاءَ لَهُمْ مَشَوْا فِيهِ وَإِذَا أَظْلَمَ عَلَيْهِمْ قَامُوا} واللي «قَامُوا» فيها بمعنى أقاموا واستقروا مكانهم، مش بمعنى وقفوا، من القيام، ونفس المعنى في قول الله سبحانه وتعالى: {وَمِنْ آيَاتِهِ أَنْ تَقُومَ السَّمَاءُ وَالْأَرْضُ بِأَمْرِهِ} يعني تثبت. ولما تحدث القرآن عن قرار الزوجين المشترك في بعض شئون الأسرة، وقال: {فَإِنْ أَرَادَا فِصَالًا عَنْ تَرَاضٍ مِنْهُمَا وَتَشَاوُرٍ فَلَا جُنَاحَ عَلَيْهِمَا} مكنش «الفصال» بمعنى الطلاق، وإنما كان بمعني فطام الطفل الرضيع. كمان ربنا سبحانه وتعالى لما اتكلم عن بعض صفات المنافقين، وقال عنهم {وَلكِنَّهُمْ قَوْمٌ يَفْرَقُونَ} كان «الفَرَق» بمعنى الفزع الشديد والخوف من أمر يتوقع حصوله، مش من الفُرقة والانفصام والاختلاف. ولما ربنا سبحانه وتعالى ذكر قصة الصحابة التلاتة اللي تخلفوا عن غزوة تبوك مع النبي ﷺ وقال عنهم في سورة التوبة: {وَعَلَى الثَّلَاثَةِ الَّذِينَ خُلِّفُوا} كان المقصود خلفوا عن قبول اعتذارهم وتوبتهم، مش تخلفوا عن الغزوة. ولما ربنا سبحانه وتعالى قال: {حَتَّى إِذَا فُتِحَتْ يَأْجُوجُ وَمَأْجُوجُ وَهُمْ مِنْ كُلِّ حَدَبٍ يَنْسِلُونَ} مكنتش ينسلون من النسل بمعنى يتكاثرون، وإنما كانت بمعنى يسرعون. وكلمة «جابوا» في قوله تعالى: {وَثَمُودَ الَّذِينَ جابُوا الصَّخْرَ بِالْوادِ}، معناها قطعوا الصخر ونحتوه، مش معناها أحضروه. ومعنى «أذنت» في قوله تعالى: {وَأَذِنَتْ لِرَبِّهَا وَحُقَّتْ} يعني سمعت وانقادت وخضعت، مش من الإذن بمعنى السماح والإباحة. وكلمة «الأم» في قوله تعالى: {وَأَمَّا مَنْ خَفَّتْ مَوَازِينُهُ فَأُمُّهُ هَاوِيَةٌ}، معناها مقدمة رأس الإنسان مش معناها أمه اللي أنجبته. دي كانت بعض كلمات القرآن الكريم اللي ممكن يكون كتير مننا فاهم معنى ليها غير مقصود القرآن منها. وإن شاء الله نستكمل في رسائل جاية تفسير كتير من آيات القرآن الكريم وبيان كتير من معاني كلماته، ربنا سبحانه وتعالى يجعلنا وإياكم من أهل القرآن الذين هم أهله وخاصته. 

لمشاهدة الفيديو:

https://www.youtube.com/watch?v=DDVcKi9pd7A