#رسائل .. سلسلة فيديوهات دعوية وتوعوية وفقهية قصيرة يقدمها مركز الأزهر العالمي للفتوى الإلكترونية لجمهور متابعيه؛ حرصًا منه على وصول مفاهيم الإسلام الصحيحة لشرائح المجتمع المختلفة؛ سيما الشباب، وعرض الموضوعات الدينية التي تمس حياتهم اليومية في صورة سهلة وشيقة.

الرسالة السادسة | أنت أفضل إنسان 👍 | مع الشيخ /  محمد صلاح _ عضو مركز الأزهر العالمي للفتوى الإلكترونية.

اللي طول ما هو بره البيت إيجابي وخدوم وكريم وبشوش وفي منتهى الجدعنة وفي البيت مش طايق كلمة من حد .. عنده مشكلة كبيرة، ومش من أفضل الناس.

واللي دائما بيجبر خاطر صُحابه أو زمايله في الشغل بس مبيعرفش يقول كلمة طيبة لأبوه أو لأمه أو لزوجته.. كمان مش من أفضل الناس.

أفضل الناس هو اللي أهل بيته مبيشفوش منه غير المعاملة الطيبة وحسن العشرة.

أفضل الناس هو اللي بيعامل أبوه وأمه وزوجته وأولاده بود ورحمة وإحسان زي ما بيعامل الناس بره البيت مش بيعتبرهم مرتبة تانية.

سيدنا النبي صلى الله عليه وسلم قال: خيركم خيركم لأهله، وأنا خيركم لأهلي.

والمعيار النبوي ده منطقي جدا الحقيقة لأن معاملة الإنسان مع أهل بيته هي الاختبار الحقيقي لحسن خلقه وصدقه وأصالة معدنه لأنه مش مضطر معاهم للتجمل أو التكلف وما فيش سبب ممكن يخليه يعاملهم معاملة طيبة غير إنه إنسان صادق وطيب وفاهم الدين فهم صحيح.

كمان الإنسان مننا لو حسبها هيلاقي إن أولى الناس بالمعروف هما فعلا أقرب الناس منه مش بس عشان القرابة وإنما عشان أقرب الناس منك دائما هتلاقيهم أصحاب فضل عليك وياما شجعوك وساندوك ووقفوا جنبك وتحملوك في كل حالاتك، وبالتالي إحسانك معاهم جزء من رد إحسانهم ليك، وجزاء الإحسان مينفعش غير إنه يبقى إحسان.

لمشاهدة الفيديو: https://www.youtube.com/watch?v=p6xX-Y2amXg