ازہر شریف کی طرف سے بنگلہ دیش کے اندر روہنگیا پناہ گزینوں کے لیے بھیجی گئی امداد کی تقسیم کا آغاز
بنگلہ دیش کی طرف بھیجے گئے ازہر شریف کے وفد نے آج بدھ کے دن ازہر شریف کی طرف سے بنگلہ دیش کے " کوکس بازار " شہر میں موجود روہنگیا مسلمانوں کی خدمت میں پیش کیا جانے والا ریلیف اور امدادی سامان تقسیم کرنے کا آغاز کیا ہے۔
ازہر شریف کے شعار اور مصری پرچم کے ساتھ یہ امداد مسلسل پانچ دن تک تقسیم کی جائے گی، اور اس کے ساتھ ساتھ ازہر شریف کا یہ امدادی وفد روہنگیا مسلمانوں کے ان بچوں کے لیے نفسیاتی اور ایمانی حوصلہ افزائی کے لیے ان کے خیموں کا بھی دورہ کرے گا، جن کے بارے میں اقوام متحدہ کی رپورٹ میں کہا گیا ہے کہ دنیا کے اندر یہ سب سے زیادہ محروم اور نظرانداز کیا جانے والا طبقہ ہے۔
امید ہے کہ آئندہ ہفتے عزت مآب امام اکبر شیخ ازہر جناب پروفیسر ڈاکٹر احمد الطیب علمائے ازہر اور مجلس حکمائے مسلمین کے اراکین کے ایک وفد کے ساتھ بنگلادیش کے اندر پناہ گزینوں کے حالات کا جائزہ لینے کے لیے روہنگیا مسلمانوں کے خیموں کا دورہ کریں گے، اور وہاں سے بین الاقوامی سوسائٹی اور عالمی ضمیر کو مخاطب کرتے ہوئے روہنگیا مسلمانوں کی اس المناک صورتحال کے بارے میں پیغام دیں گے۔
امام اکبر نے ان لاکھوں روہنگیا مسلمانوں کی پریشانی کو کم کرنے کے لیے ازہر شریف اور مجلس حکمائے مسلمین کی طرف سے فوری طور پر طبی اور امدادی سامان بھیجنے کا حکم صادر فرمایا ہے، جو اپنے ملک میانمار میں ظلم وزیادتی اور نسل کشی کے خوف سے پڑوسی ملک بنگلہ دیش کی طرف بھاگنے پر مجبور ہوئے ہیں۔